काठमाडौँ, २० वैशाख ।
परराष्ट्रमन्त्री डा प्रकाशशरण महत सिङ्गापुरमा हुने नेपाली पर्यटन, व्यापार तथा लगानी सम्बन्धी सम्मेलनमा सहभागिता जनाउन थाइल्यान्ड प्रस्थान गर्नुभएको छ ।
थाईल्याण्डस्थित नेपाली राजदूतावास र सिङ्गापुरस्थित नेपाली अवैतनिक महावाणिज्यदूतावासले भोली आयोजना गर्ने सम्मेलनमा मन्त्री महतले बिशेष संबोधन गर्नुहुनेछ ।
सिङ्गापुरमा रहँदा उहाँले त्यहाँका विदेश मामिला एवम् मानवसंशाधन सम्बन्धी उपमन्त्री जोसेफिन तेओसँग द्विपक्षीय भेटवार्ता गर्नुहुने कार्यक्रम छ ।
परराष्ट्र मन्त्री डा महत शुक्रबार सिङ्गापुरबाटै भारतका लागि प्रस्थान गर्नुहुने छ । भारतीय राजधानी नयाँ दिल्लीस्थित नेपालका लागि विभिन्न मुलुकका गैरआवासीय राजदूतहरुको यही मे ५ देखि आयोजना गरिने दुई दिने सम्मेलनको परराष्ट्रमन्त्री डा महत र भारतीय विदेशमन्त्री सुस्मा स्वराजले संयुक्त रुपमा उद्घाटन गर्नुहुने कार्यक्रम छ ।
सो सम्मेलनमा नेपालको आर्थिक कुटनीतिअन्तर्गत आर्थिक विकास, व्यापार तथा लगानी प्रवद्र्धन, पर्यटनलगायतका विषयमा परराष्ट्र सचिव शङ्करदास वैरागीसहित नेपाल र भारतका विज्ञको प्रस्तुति रहने छ । मन्त्री डा महत आगामी शनिबार स्वदेश फर्किनु हुने कार्यक्रम छ ।
