धनगढी, बैशाख ९ ।
धनगढीको सशस्त्र प्रहरीको क्रिकेट मैदानमा भएको धनगढी प्रिमियर लिग (डीपीएल)अन्तर्गत पहिलो संस्करणको उपाधि धनगढीकै चौराह टीमले हात पार्न सफल भएको छ ।
लिग चरणका सुरुवाती तीन खेलमा पराजित भएर पनि त्यसपछिका सम्पूर्ण खेलमा जित हात पार्दै पारस खड्का नेतृत्वको धनगढीले उपाधि उचाल्न सफल भएको हो ।
टस जितेर पहिले ब्याटिङ गरेको टीम चौराह धनगढीले आरिफ शेखको अर्धशतक मद्दतमा निर्धारित २० ओभरमा पाँच विकेट गुमाएर १५९ रन बनाएको थियो । १६० रनको लक्ष्य पछ्याएको विराटनगर किङ्स १८ ओभर १ बलमा ९७ रनमै अलआउट भएपछि चौराहा धनगढीले ६२ रनको जित सुनिश्चित गरेको हो ।
विराटनगर किङ्सका लागि प्रनित थापामगरले सर्वाधिक २७ रन बनाए । अमित श्रेष्ठले २६ तथा दिपेन्द्र सिंह ऐरी र अनिल साहले समान १३ रन बनाउनु बाहेक अन्यले दोहोरो अंक छुन सकेनन् । विराटनगरलाई सस्तैमा समेट्न सुशील भारीले ३, सौरभ खनालले २ र आरिफ शेखले एक विकेट लिए ।
यसअघि, टस जितेर पहिले ब्याटिङ गरेको धनगढीले निर्धारित ओभरमा ५ विकेट गुमाएर १ सय ५९ रनको योगफल तयार पारेको हो । सामान्य सुरुवात गरेको धनगढीले अन्तिम ८ ओभरमा १ सय ११ रन जोडेपछि उच्च योगफल तयार पार्न सफल भयो । मध्यक्रमका ब्याट्सम्यान आरिफ शेख, अमर राउटेला र कप्तान खड्काले उत्कृष्ट पारी खेलेपछि ३७ रन जोड्दा ३ विकेट गुमाएको स्थितिबाट सम्हालिँदै धनगढीले उच्च योगफल तयार पारेको हो ।
आरिफले सर्वाधिक ५४ रन बनाए । चार छक्का र चार चौकाको मद्दतमा आरिफले ३० बलमा ५४ रन जोडे । यस्तै मात्र १५ बल खेलेका राउटेला ३१ रनमा नटआउट रहे । आरिफ र राउटेलाले पाँचौ विकेटका लागि मात्र ४ ओभरमा ६३ रनको साझेदारी गरे । विराटनगरका सुशील कँडेलले २ तथा सन्दिप लामिछाने, प्रकाश बिष्ट र जितेन्द्र मुखियाले समान एक एक विकेट लिएका थिए ।
