काठमाडौं, बैशाख ७ ।
मधेश केन्द्रित दल आबद्ध सांसद्हरूले व्यवस्थापिका–संसद्को बैठक बहिष्कार गरेका छन् ।
आजको संसद् बैठक सुरु हुनेबित्तिकै सांसद् अकवाल अमशद साहले मधेशी जनताको माग र भावनालाई सरकारले सम्बोधन गर्न नचाहेको र अधिकार दिन नचाहेको भन्दै गुनासो गरेका थिए ।
संविधान निर्माणको क्रमदेखि नै आफूहरूले उठाउँदै आएका मागमाथि पटक पटक धोका भएको र सरकारले संसद्मा प्रस्तुत गरेको संविधान संशोधन प्रस्ताव अपूर्ण रहेको उनले बताएका थिए ।
उनको उक्त धारणालगत्तै मधेश केन्द्रित दलका सांसद्हरूले बैठक बहिष्कार गरेको थियो । निर्वाचनको वातावरण बनाउन आग्रह गर्दै व्यवस्थापिका–संसद्को आजको शून्य समयमा सांसद्हरूले स्थानीय तथा राष्ट्रिय समस्याका विषयमा सदन र सरकारको ध्यानाकर्षण गराएका थिए ।
उनीहरूले सरकारबाट यही बैशाख ३१ गते स्थानीय तहको निर्वाचनको मिति घोषणा भइसकेको अवस्थामा राजनीतिक समस्या समाधान गरी निर्वाचनको वातावरण बनाउन सबैसँग आग्रह गरेका थिए ।
