काठमाडौं, बैशाख ६ ।
प्रधानमन्त्री पुष्पकमल दाहालले प्रतिपक्षी एमालेलगायतका दलहरूलाई वर्तमान राजनीतिक परिस्थितिका बारेमा छलफल गर्न बालुवाटारमा एक बैठक राखिएका छन् । मधेशी मोर्चाले संविधान संशोधनको दोश्रो प्रस्तावमासमेत असहमति राखेर आन्दोलनको घोषणा गरेपछि चुनाव र मोर्चाका मागहरूका बारेमा सहमति खोज्ने प्रयासस्वरूप प्रधानमन्त्रीले बैठक बोलाएका हुन् ।
बिहान ९ बजेदेखि सुरु भएको बैठकमा नेपाली कांग्रेस, एमाले, माओवादी, राप्रपा, फोरम लोकतान्त्रिकका नेताहरू सहभागी हुने सचिवालयले जनाएको छ । आजको बैठकमा चुनावको तयारी अन्तिम चरणमा पुगेको बेला मधेशी मोर्चा र अन्य दलहरूले आन्दोलन सुरु गरेपछिको परिस्थितिका बारेमा छलफल हुनेछ ।
यसका साथै दुई नम्बर प्रदेशमा चुनावको मिति सार्ने या नसार्ने विषयमासमेत आज सहमति गरिने सम्भावना रहेको छ । प्रधानमन्त्री प्रचण्डले चुनाव हुनेमा शंका नगर्न बारम्बार बताउँदै आएका छन् । जसरी पनि चुनाव गराई छाड्ने र मधेशी मोर्चालाई समेत चुनावमा सहभागिता गराउँन सरकारले हदैसम्मको प्रयास गरिरहेको उनले बताएका छन् ।
