काठमाडौ ५ वैशाख ।
प्रधानमन्त्री पुष्पकमल दाहालले आगामी वैशाख ३१ का लागि तोकिएको स्थानीय तह निर्वाचनको सुरक्षा तयारीका विषयमा आज बिहान सुरक्षा निकायका प्रमुखहरुसँग छलफल गर्नुभएको छ ।
आफ्नै निवास बालुवाटारमा चार वटै सुरक्षा निकायका प्रमुखहरुलाई बोलाएर उहाँले वैशाख ३१ गते हुने स्थानीय तहको चुनावमा सुरक्षा प्रबन्धका बारेमा छलफल गर्नुभएको बालुवाटार स्रोतले जनाएको छ ।
सो क्रममा प्रधानमन्त्री दाहालले देशको सुरक्षा अवस्थाका बारेमा जानकारी लिदै निर्वाचनका लागि प्रभावकारी सुरक्षाको प्रबन्ध मिलाउन सुरक्षा प्रमुखहरुलाई निर्देशन दिनुभएको बताइएको छ ।
जवाफमा सुरक्षा अङ्गका प्रमुखहरुले देशमा शान्ति सुरक्षाको अवस्था सामान्य रहेको जानकारी गराउदै निष्पक्ष, स्वतन्त्र र भयरहित रुपमा निर्वाचन सम्पन्न गर्न सुरक्षा निकाय पूर्णतः सक्षम रहेको बताएका थिए ।
छलफलमा प्रधान सेनापति राजेन्द्र क्षेत्री, प्रहरी महानिरीक्षक प्रकाश अर्याल, सशस्त्र प्रहरी महानिरीक्षक सिंहबहादुर श्रेष्ठ र राष्ट्रिय अनुसन्धान विभागका प्रमूख दीलिप रेग्मी सहभागी हुनु भएको थियो ।
