काठमाडौं, बैशाख ५ ।
प्रधानमन्त्री पुष्पकमल दाहालले सुरक्षा अङ्गका प्रमुखहरूलाई बालुवाटारमा बोलाएर देशको सुरक्षा अवस्थाबारे जानकारी लिएका छन् ।
प्रधानमन्त्री दाहालले आज बिहान नेपाली सेनाका प्रधान सेनापति रबिन्द्र क्षेत्री, नेपाल प्रहरीका महानिरीक्षक प्रकाश अर्याल, सशस्त्र प्रहरी बलका महानिरीक्षक सिंहबहादुर श्रेष्ठ र राष्ट्रिय अनुसन्धानका प्रमुख दीलिप रेग्मीलाई बालुवाटारमा बोलाएर मुलुकको सुरक्षा अवस्थाबारे जानकारी लिएको हो ।
भेटघाटमा प्रधानमन्त्रीले बैशाख ३१ गते हुने स्थानीय तहको निर्वाचनका सम्बन्धमा गरिएको सुरक्षा तयारीबारे सुरक्षा अङ्गका प्रमुखहरूसँग जानकारी लिएको थियो । भेटमा प्रधानमन्त्रीले निर्धारित मितिमै स्थानीय तहको निर्वाचन सम्पन्न हुने जानकारी गराउँदै निर्वाचनका लागि प्रभावकारी सुरक्षा प्रबन्ध गर्न सुरक्षा प्रमुखहरूलाई निर्देशन दिएको छ ।
भेटमा सुरक्षा अङ्गका प्रमुखहरूले देशमा शान्ति सुरक्षाको अवस्था सामान्य रहेको बताउँदै निष्पक्ष, स्वतन्त्र र भयरहित रूपमा निर्वाचन सम्पन्न गर्न सुरक्षा निकाय पूर्णतः सक्षम रहेको र निर्वाचन सुरक्षाको तयारी भइरहेको जानकारी गराएका थिए ।
