काठमाडौ ४ वैशाख ।
उपप्रधान तथा गृहमन्त्री विमलेन्द्र निधीले वैशाख ३१ का लागि तोकिएको स्थानीय तहको निर्वाचनका लागि केही प्रतिकुलता रहेको बताउनु भएको छ । प्रतिकुलताका बाबजुद निर्वाचन सफल हुने उहाँले बताउनुभयो ।
मध्यपश्चिम क्षेत्रीय सुरक्षा सम्मेलनलाई आज नेपालगञ्जमा सम्बोधन गर्दै गृहमन्त्री निधीले स्थानीय तहका चुनावका लागि केही असन्तुष्टि, असहमति र प्रतिकुलताको अवस्था रहेको बताउनुभयो ।
उहाँले सम्मेलनमा सहभागी चारवटै सुरक्षा निकायका प्रमुख तथा मध्यपश्चिम विकास क्षेत्रका १५ जिल्लाका सुरक्षा प्रमुखलाई निर्देशन दिँदै निर्वाचन पूर्व, निर्वाचन अवधी र निर्वाचनपछि गरी तीनचरणको सुरक्षा रणनीति तयार पारिएको जानकारी दिनुभयो ।
गृहमन्त्री निधीले केन्द्रीय सुरक्षा नीति र योजना बनाएर कार्यान्वयन गरिएको बताउँदै मतदाता, उम्मेद्वार, राजनीतिक दल, चुनावमा खटिने कर्मचारी लगायत मतदानस्थल र बाहिरको सुरक्षाको जिम्मा सरकारको भएको बताउनुभयो ।
नेपाली सेना, नेपाल प्रहरी, सशस्त्र प्रहरी र राष्ट्रिय अनुसन्धान विभाग गरी चारवटै सुरक्षा निकायबिच समन्वयात्मक भूमिकामा परिचालन हुने जानकारी दिनुभयो । स्थानीय तहको निर्वाचनलाई लक्षित गरी क्षेत्रीय सुरक्षा सम्मेलनको आयोजना गरेको हो ।
