काठमान्डौ ,बैशाख १ ।
धनगढीमा जारी धनगढी प्रिमियर लिग क्रिकेट अन्तरगत आज बिहान भएको खेलमा रुपन्देही च्यालेन्जर्सले काठमाडौं गोल्डेन्सलाई १५ रनले पराजित गरेको छ ।
क्षेत्रीय प्रहरी कार्यालयको मैदान धनगढीमा भएको खेलमा १ सय ३६ रनको लक्ष्य पछ्याएको काठमाडौं निर्धारित २० ओभरमा ९ विकेट गुमाएर १ सय २० रनमा समेटियो ।
काठमाडौंका लागि सुभेन्दु पाण्डेले १४ बलमा २० रन, सुमित महर्जनले ३७ बलमा २७ रन, रोहित कुमारले १७ बलमा २० रन बनाए भने अन्य ब्याट्सम्यानले दोहोरो अंकमा रन जोड्न सकेनन् ।
रुपन्देहीका शक्ति गौचनले तीन, विक्रम शोब र कृष्ण कार्कीले दुई दुई साथै पुष्प थापा र साहव आलमले एक एक विकेट लिए । यसअघि टस जितेर पहिले ब्याटिङ गरेको रुपन्देहीले निर्धारित ओभरमा ९ विकेट गुमाएर १ सय ३५ रन बनाएको थियो ।
रुपन्देहीका शंकर रानाले ३६ बलमा १६ रन, नुरध्वज सेनले २२ बलमा ३७ रन, पुष्प थापाले ३३ बलमा ३६ रन, प्रकाश केसीले १० बलमा १२ रन र बिक्रम शोबले ५ बलमा १० रन बनाए ।
काठमाडौंका लागि सोमपाल कामीले ४ साथै मञ्जित श्रेष्ठ, बसन्त रेग्मी र सन्तोष भट्टले एक एक विकेट लिए ।
आजै हुने दोस्रो खेलमा धनगढी टिम चौराहले सिवाईसी अत्तरियाको सामना गर्नेछ ।
यस अघि हिजो भएको खेलमा विराटनगर किङ्स र कन्चनपुर आइकोनिक विजयी भएका छन् । प्रतियोगिताको विजेताले १५ लाख र उपविजेताले सात लाख नगद पुरस्कार हात पार्नेछन् ।
