काठमाडौ १ वैशाख ।
गोरखामा ६ वटा राजनीतिक दलले आगमी वैशाख ३१ मा हुने स्थानीय तह निर्वाचनमा दलीय हैसियतमा भाग लिन नपाउने भएका छन् ।
संसदमा प्रतिनिधित्व नगरेका दलहरुलाई चुनाव चिन्ह नदिने निर्वाचन ऐनमा उल्लेख भए अनुसार उनीहरुले आगामी निर्वाचनमा दलीय हैसियतमा भाग लिन नपाउने भएका हुन् ।
जिल्ला निर्वाचन कार्यालयमा दर्ता भएका १६ मध्ये ६ दलले चुनावमा भाग लिन नपाउने जिल्ला निर्वाचन अधिकारी राजेन्द्रप्रसाद पोखरेलले बताउनुभयो ।
निर्वाचन कार्यालयमा दल दर्ता भएपनि चुनाव चिन्ह नपाएपछि ती दल दलीय हैसियतमा चुनावमा भाग लिनबाट ती दल बञ्चित हुनुपरेको हो ।
पोखरेलका अनुसार नयाँ शक्ति पार्टी, नेपाल कम्युनिष्ट पार्टी माले जनसमाजवादी, युनाइटेड ग्रीन अर्गनाइजेशन, नेपाल गान्धीवादी पार्टी, देशभक्त पर्यावररणीय सामाजिक मोर्चा र पूर्व राष्ट्रसेवक लोकतान्त्रिक पार्टीले निर्वाचनमा भाग लिन नपाउने भएका हुन् ।
