ललितपुर, चैत्र ३१ ।
भोलिबाट नयाँ वर्ष २०७४ सुरु हुँदैछ । देशमा विभिन्न घटना र परिचर्चा भए र पछिल्लो समयमा २०७३ सालको अन्त्यमा आएर चुनावी माहौललाई तताएर बिदा हुँदैछ । योसँगै देशमा तीन वटै तहको निर्वाचन गर्ने वातावरण तयार हुँदै गएको छ । अर्कोतिर जनता पनि खुसी नै देखिएका छन् । धेरै वर्ष पछि स्थानीय तहको निर्वाचन गर्ने माहौल तयारीमा दलहरू जुटेका छन् भने शीर्ष दलका नेताहरू चुनावी माहौललाई थप बढावा दिन आ–आफ्ना गृह जिल्ला पुगिसकेका छन् ।
यसैबीच, ललितपुरका गाउँ तथा महानगरपालिकामा चुनावी माहौल दिनानुदिन बढ्दै गएको छ । नेकपा एमाले जिल्ला कमिटीको निर्देशनअनुसार सात बुँदे मापदण्डको परिधीमा रहेर चैत्र ३० गते कार्यपालिकास्तरीय कमिटीको बैठकबाट उम्मेदवारका आकांक्षीहरूको नाम सिफारिस गरिएको जिल्ला कमिटीका प्रचार विभाग प्रमुख अमृतनाथ तिमल्सिनाले बताए ।
एमाले महालक्ष्मी नगर कमिटीको बैठकले प्रमुखमा किशोर केसी, रामेश्वर श्रेष्ठ, सूर्यबहादुर थापा, शैलेन्द्र राउत र हरिगोबिन्द श्रेष्ठको नाम सिफारिस गरेको छ भने उपमेयरमा उमा दाहाल, उर्मिला दाहाल, गंगा दाहाल, निर्मला थापा, प्रगति डंगोल, मीरा केसीको नाम सिफारिस गरेको छ ।
यस्तै गोदावरी नगर कमिटीले गोदावरी नगरपालिकाको प्रमुखमा गोमा घिमिरे, चेतनाथ सञ्जेल, पुरुषोत्तम आचार्य, मिठाराम केसी, रघुनाथ महर्जन, श्यामकृष्ण सिलवालको नाम सिफारिस गरेको छ भने उपप्रमुखमा अन्नपूर्ण बस्नेत, तारा सञ्जेल, सरिता केसी, अम्बिका बस्नेतको नाम सिफारिस गरेको छ ।
यस्तै महाँकाल गाउँपालिकाबाट प्रमुखमा अमृतनाथ तिमल्सिना, नवराज महत, बिमला दुलाल, रामचन्द्र दाहाल, श्याम बजगाईको नाम सिफारिस भएको छ भने उपप्रमुखमा कमला तामाङ्ग, कमला तिमल्सिना, गोमा घिमिरे, रेनुका बजगाईको नाम सिफरिस भएको छ ।
वागमती गाउँपालिकाको प्रमुखमा दुर्गा घिमिरे, नवराज सञ्जेल र रामहरी घिमिरेको नाम सिफारिस भएको छ भने उपप्रमुखमा बिमला लामिछाने मगर, डोल्माकुमारी सिन्तान, सरस्वती दाहालको नाम सिफारिस भएको छ ।
यस्तै कोन्ज्योस्योम गाउँपालिकाको प्रमुखमा कृष्णमान लामाको एकल नाम सिफारिस भएको छ । उपप्रमुख मिनु घिमिरे हुमागाई, राधा न्यौपाने, सुस्मिता दुलाल, विष्णु तामाङ्ग, सपना वलको नाम सिफारिस भएको छ ।
नेकपा एमालेले महानगरपालिका, नगरपालिका र गाउँपालिकाका वडाका उम्मेदवारहरू यसअघि नै सिफारिस गरिसकेको छ । बैशाख ३ गते बस्ने जिल्ला कमिटी बैठकले वडाका उम्मेदवारहरूको निर्णय गर्नेछ भने गाउँ तथा नगरपालिकाका प्रमुख उपप्रमुखको उम्मेदवारीका नामहरू प्रदेश कमिटीमा सिफारिस गर्ने प्रचार विभाग प्रमुख तिमल्सिनाले जानकारी दिएका छन् । महानगरपालिकाका उम्मेदवारहरूको सिफारिस बैशाख ३ गते जिल्ला कमिटी बैठकले गर्नेछ ।
