कैलाली ,३१ चैत ।
धनगढीमा जारी धनगढी प्रिमियर लिग डिपिएल क्रिकेटमा आज भएको पहिलो खेलमा विनोद भण्डारीको कञ्चनपुर आइकोनिक ११ रनले विजयी भएको छ ।
क्षेत्रीय प्रहरी कार्यालयको मैदान धनगढीमा आज विहान भएको खेलमा पारस खड्काको कप्तानीमा रहेको धनगढी टिम चौराहा कञ्चनपुर आइकोनिकसँग पराजित भएको हो ।
खेलमा १ सय ६ रनको लक्ष्य पछ्याएको धनगढी १७ ओभर ४ बलमा ९४ रन बनाउँदा अल आउट भयो । धनगढीका अनिल मडण्लले १५ बलमा १२ रन, आरिफ शेखले ३२ बलमा २२ रन, पारस खड्काले २३ बलमा २३ रन बनाए ।
यस्तै पृथु बास्कोटाले १७ बलमा १९ रन बनाए । धनगढीका चार जना ब्याट्सम्यान शून्यमा आउट भए । प्रेम तामाङ र सुसन भारी एक एक रनमा आउट भए । कञ्चनपुरका अभिनाश कर्णले तीन, ललित भण्डारी र चन्द्र साउदले दुई दुई साथै सिद्धान्त लोहनी र सुनिल धमलाले एक एक विकेट लिए ।
यसअघि टस जितेर पहिले ब्याटिङ गरेको कञ्चनपुरले निर्धा्रित २० ओभरमा ६ विकेट गुमाएर १ सय ५ रन बनाएको थियो । कञ्चनपुरका लागि सागर पुनले ४३ बलमा २० रन, सुनिल धमलाले ३७ बलमा ३९ रन, सिद्धान्त लोहनीले २० बलमा २७ रन बनाए ।
कञ्चनपुरका ५ जना ब्याट्सम्यानले दोहोरो अंकमा रन बनाउन सकेनन् । धनगढीका रामनरेश गिरी र आरिफ शेखले दुई दुई साथै सुशन भारी र प्रेम तामाङले एक एक विकेट लिएका थिए ।
