काठमाडौँ, २४ चैत ।
प्रमुख निर्वाचन आयुक्त डा. अयोधिप्रसाद यादवले मधेसमा उठ्दै आएको समस्याबारे यथाशक्य छिटो ठोस निर्णयमा पुग्न सरकारलाई सुझाव दिनुभएको छ ।
निर्वाचन आयोगद्वारा आज ललितपुरको गोदावारीमा आयोजित निर्वाचन व्यवस्थापन प्रशिक्षण कार्यक्रममा उहाले आज बेलुकासम्म नेपाल सरकारबाट ठोस निर्णय आउन नसके आयोगलाई अठ्यारो पर्ने बताउनु भयो ।
धेरै मतदाता भएका मधेसका जिल्लाको मतपत्र र मतदाता परिचयपत्र छाप्नुपर्ने समय भइसकेकाले त्यसअघि नै सरकारबाट ठोस निर्णय हुन पर्ने बताउनु भयो । सरकारबाट समयमै निर्णय हुन नसके आयोगले दृढतापूर्वक सबै क्षेत्रको मतपत्र छपाइ गरेर निर्वाचनको तयारीमा जुट्ने बताउनु भयो ।
नेपाल सरकारबाट निर्वाचनमा खटिएर जाने कर्मचारीलाई काम गर्ने अनुकूल वातावरण र सुरक्षाको पूर्ण प्रत्याभूति हुन आवश्यक रहेको बताउँदै उहाँले आयोगले जटिलताको बीचमा पनि जिल्लामा मतदाता शिक्षा, मतदाताका लागि आवश्यक सामग्रीको व्यवस्थापन गरेर अघि बढिरहेको जानकारी दिनुभयो ।
