काठमाडौं ,चैत्र २२ ।
स्थानिय तह निर्वाचन नजिकिदै गर्दा सत्तारुढ तथा प्रतिपक्षी दहरु निर्वाचन घोषणा पत्रको तयारीमा जुटेका छन् ।
सत्तारुढ नेपाली काग्रेस र माओवादी केन्द्र तथा प्रमुख प्रतिपक्षी एमाले लगायतका दलहरु निर्वाचन तयारीका साथै घोषणापत्र तयारीमा लागेका हुन् ।
त्यसैक्रममा एमालेको स्थानीय तह निर्वाचन घोषणापत्र मस्यौदा समितिको वैठक अहिले केहीबेरमा वस्दैछ ।
पार्टी उपाध्यक्ष बामदेव गौतम संयोजकत्वको समितिले स्थानीय निर्वाचनमा पार्टीको एजेण्डा र अन्य आर्थिक विषयलाई समेटेर घोषणा पत्र तय गर्ने सचिव योगेश भट्टराईले जानकारी दिनुभयो ।
माओवादी केन्द्रले पनि केहीदिन भित्रै निर्वाचन घोषणा पत्र जारी गर्ने तयारी गरेको छ । सिंहदरवारको अधिकार जनताका हातमा लैजान सफल भएको, सरकारमा रहेर राम्रो काम गरेको, महिला दलित लगायत अल्पसंख्यकको अधिकार सुनिश्चित गर्न पार्टीले खेलेको भूमिका र सरकारमा रहेर राम्रो काम गर्न सफल भएको दावी गरेको माओवादी केन्द्रले थप महत्वकांक्षी योजनासहित निवार्चन घोषणापत्र तयार गरिसकेको छ ।
सो घोषणापत्रलाई केन्द्रीय कार्यालय वैठकले पारित गरिसकेको भन्दै केहीदिनमा जारी गर्ने पार्टी प्रवत्ता पम्फा भुषलले जानकारी दिनुभयो ।
यस्तै काग्रेसले पनि महत्वकांक्षी घोषणापत्र बनाउने तयारी गरेको छ । भोली वस्ने घोषणापत्र समिति वैठकले अन्तिम रुप दिने कंग्रेसले जनाएको छ ।
त्यसअघि आजै निर्वाचन परिचालन समितिको वैठक आजै बस्दैछ ।
ललितपुरको सानेपास्थित पार्टी कार्यालयमा मध्यान्ह वस्ने कंग्रेस सांसद, केन्द्रीय सदस्य तथा पूर्व जिल्ला सभापति सहितको वैठकमा निर्वाचन तयारीबारे छलफल हुने केन्द्रीय सदस्य रामकृष्ण यादवले जानकारी दिनुभयो ।
संसदको चौथो ठूलो दल राप्रपा लगायत दलले पनि निर्वाचन घोषणापत्र छिट्टै सार्वजनिक गर्ने बताएका छन् । निर्वाचन लक्षित महत्वकांक्षी योजना अघि सार्दै आएका दलहरुले स्थानिय निर्वाचनका लागी पनि पूर्वाधार विकास, सुचना प्रविधि, कृषिको आधुनिकीकरण जस्ता महत्वकांक्षी योजना सार्वजनिक गर्ने तयारी गरेका छन् ।
संसदबादी दलहरु निर्वाचनको तयारी स्वरुप घोषणापत्रलाई अन्तिम रुप दिने कसरतमा रहेपनि नेपाल कम्युनिष्ट पार्टी भने निर्वाचन खारेजीमा लागेको छ । पार्टी प्रवत्ता खड्कबहादुर विश्वकर्मा प्रकाण्डले निर्वाचन खारेजीमा आफ्नो पार्टी लागेको जानकारी दिदै देशैभर अभियान चलाउन लागीएको जानकारी दिनुभयो ।
