काठमाडौ, चैत्र १७ ।
डा. बाबुराम भट्टराईले नेतृत्व गरेको नयाँ शक्ति नेपाल र उपेन्द्र यादवले नेतृत्व गरेको संघीय समाजवादी फोरम नेपालबीच एकीकरण गर्ने तयारी भइरहेको छ ।
नयाँ शक्ति नेपालको वार्ता टोलीका संयोजक रामचन्द्र झाले पार्टीको बैठकमा स्थानीय तहको चुनाव अगाडि नै पार्टी एकीकरण हुने जानकारी दिएका छन् । पार्टीको केन्द्रीय परिषद्को बैठकमा झाले बैशाख १ गते पार्टी कार्यकर्तालाई नयाँ वर्षको उपहार स्वरूप संघीय समाजवादी पार्टीसँग पार्टी एकीकरण हुने बताए ।
झाले ८० प्रतिशत कुरा मिलिसकेको दाबी गरेका छन् । संघीय समाजवादी फोरमसँग पार्टी एकीकरणबारे वार्ता गर्न नयाँ शक्ति नेपालले झाको नेतृत्वमा गंगानारायण श्रेष्ठ र खिमलाल देवकोटालाई वार्ता टोलीमा समाबेश गरेको छ ।
नयाँ शक्ति नेपालका नेता झाले बैशाख १ गतेभित्र पार्टी एकता गर्ने योजना रहेको बताएका छन् । उनले भने, ‘छलफल भइरहेको छ, केही विषयको टुंगो लगाउन बाँकी छ । सामान्यतया बैशाख १ गते एकता गर्ने भन्ने कुरा छ ।’ तर, नयाँ शक्तिका नेताहरूले भने बैशाख १ मै एकता हुनेमा शंका व्यक्त गरेका छन् ।
फोरम सहअध्यक्ष राजेन्द्र श्रेष्ठले नयाँ शक्ति निकटतम शक्तिमा पर्ने र आफ्नो पार्टी पनि एकीकरणको पक्षमा रहेको बताए । तर, दुई पार्टीबीच एकता हुनु अघिका धेरै प्रक्रियाहरू पूरा हुन बाँकी रहेको भन्दै उनले भने, ‘जाडो लाग्यो भन्दैमा राति घाम लाग्दैन । त्यसैले अहिले नै तोकेको मितिमा पार्टी एकता हुन्छ भन्ने कुरामा कुनै सत्यता छैन ।’
