काठमाडौं, चैत १५।
एसिया कप छनौट अन्तर्गत नेपालले आज फिलिपिन्सको सामना गर्दै छ । मनिलाको रिजल मेमोरियल रंगशालमा हुने खेल नेपाली समय अनुसार बेलुका पौने ६ बजे पछि सुरु हुनेछ ।
एएफसी सोलिडारिटी कपको उपाधि जितेकाले नेपालले एसिया कप छनौट खेल्ने अवसर पाएको हो । सन् २०१५ मा भारतसँग समग्रमा २–० ले जितेपछि नेपाल एएफसी सोलिडारिटी कप खेल्न गएको थियो । सोलिडारिटीको उपाधि जितेपछि नेपालले फेरि एसिया कप छनौटमा स्थान बनाएको हो ।
फिफा बरियतामा नेपाल भन्दा निकै माथि रहेको फिलिपिन्स एसियाको बलियो टिम मानिन्छ । बरियतामा नेपाल एक सय ७० तथा फिलिपिन्स एक सय २४ औं स्थानमा छ । फिलिपिन्ससँगका पछिल्ला तीन खेलमा सबैमा नेपाल पराजित भएकाले पनि नेपाललाई आजको खेल चुनौति पूर्ण रहेको छ ।
नेपाल रहेको समूह ‘एफ’ मा ताजकिस्तान, यमन र फिलिपिन्स रहेका छन् । समूहको विजेता वा उपविजेता बनेमा नेपालले सन् २०१९ मा युएईमा हुने एसिया कप खेल्न पाउने छ । यही चैत १२ गतेदेखि सुरु भएको उक्त प्रतियोगिता चैत २२ सम्म चल्नेछ ।
