काठमाडौ १४ चैत्र ।
उपप्रधान तथा गृहमन्त्री बिमलेन्द्र निधिले सरकारले आगामी बैशाख ३१ का लागि घोषणा गरेको स्थानीय तहको निर्वाचन तोकिएकै समयमा एकै चरणमा हुने बताउनु भएको छ ।
पूर्वाञ्चल क्षेत्रीय सुरक्षा समितिको बैठकमा सहभागी हुन आज मोरङ पुग्नु भएका मन्त्री निधिले बिराटनगर बिमानस्थलमा सञ्चारकर्मीसँग कुरा गर्दै मधेसी मोर्चालाई समेत सहभागी गराएर चुनावको वातावरण बनाउन सरकारले गृहकार्य गरिरहेको बताउनु भयो ।
स्थानीय तहको निर्वाचन दुई चरणमा गर्ने बारे चर्चा भइरहे पनि सरकारले एकै चरणमा गर्ने निर्णय गरिसकेको र त्यसका लागि सुरक्षा लगायत सबै तयारी भइसकेको जानकारी गराउनु भयो ।
मधेसी मोर्चाको मूख्य मागको रुपमा रहेको सीमांकन हेरफेरबारे उच्चस्तरीय आयोग बनाएर चाँडै टुंग्याउन सरकार प्रयत्नशील रहेको उहाँले बताउनु भयो ।
निर्वाचन लक्षित सुरक्षा योजना बनाउन पूर्वाञ्चल क्षेत्रीय सुरक्षा समितिको बैठक अहिले क्षेत्रीय प्रहरी कार्यालयको सभाहलमा सुरु भएको छ ।
बैठकमा क्षेत्रीय प्रशासक, पूर्वाञ्चल प्रहरी प्रमुखसहित सबै जिल्लामा प्रमुख जिल्ला अधिकारी, जिल्ला प्रहरी प्रमुख लगायतका अधिकारीहरु सहभागी छन् ।
