काठमाडौ १३ चैत्र ।
लामो समयपछि बसेको नेपाली कांग्रेसको केन्द्रिय कार्यसमिति बैठकले केन्द्रीय कार्यसम्पादन समिति गठन गरेको छ । ललितपूरको सानेपास्थित पार्टी केन्द्रिय कार्यलयमा जारी बैठकले तीन पदाधिकारी सहित मर्यादाक्रम अनुसार २२ जनालाई कार्यसम्पादन समितिमा मनोनयन गर्ने प्रस्ताव पारित गरेको हो ।
२५ सदस्यीय कार्यसम्पादन समितिमा सभापति शेरबहादुर देउवा, महामन्त्री शशांक कोइराला, कोषाध्यक्ष सीतादेवी यादव, केन्द्रीय सदस्यहरु प्रकाशमान सिंह, कृष्णप्रसाद सिटौला, गोपालमान श्रेष्ठ, विमलेन्द्र निधि, कुलबहादुर गुरुङ, खुमबहादुर खड्का, चित्रलेखा यादव, पूर्णबहादुर खड्का, रामशरण महत, अर्जुननरसिंह केसी छन् ।
त्यस्तै, बलबहादुर केसी, महेश आचार्य, नरहरि आचार्य, प्रदीप गिरी, बालकृष्ण खाँण, ज्ञानेन्द्रबहादुर कार्की, रमेश रिजाल, नारायण खड्का, मिनेन्द्र रिजाल, प्रकाशशरण महत, फरमुल्लाह मन्सुर र मानबहादुर विश्वकर्मा रहेका छन् ।
केन्द्रीय समिति बैठकले स्थानीय तहको निर्वाचनका लागि पार्टीको घोषणा पत्र बनाउन केन्द्रीय सदस्य महेश आचार्यको संयोजकत्वमा समिति समेत गठन गरेको छ ।
जारी बैठकमा समसामयिक विषय, निर्वाचनको तयारी, संविधान संशोधन र पार्टी सञ्चालनबारे छलफल भइरहेको कांग्रेसले जनाएको छ । लामो समयपछि बसेको कांग्रेस केन्द्रीय समिति बैठकमा सभापति देउवाले ९ बुँदे एजेण्डा पेस गरेका छन् ।
बैठकमा अहिले सभापति देउवाले पेश गर्नुभएको एजेन्डामाथि सदस्यहरुले धारणा राखिरहेका छन् । यस्तै मुलुकको पछिल्लो राजनितिक अवस्था र मोर्चाको माग सम्बोधनका लागि गर्ने भनिएको संविधान संशोधनका विषयमा पनि बैठकमा छलफल भइरहेको जनाएको छ ।
