काठमाण्डौ, चैत्र १२ ।
चीन भ्रमणमा रहनुभएका प्रधानमन्त्री पुष्पकमल दाहाल बेइजिङ पुग्नु भएको छ । उहाँ बोआओ फोरमको उद्घाटन सत्रलाई सम्बोधन गरि राजनीतिक भेटघाटलगत्तै बेइजिङ जानुभएको हो ।
प्रधानमन्त्रीलाई बेइजिङमा चिनियाँ परराष्ट्र मन्त्रालय र चिनियाँ कम्युनिष्ट पार्टीको विदेश विभागका अधिकारीहरुले विमानस्थलमा स्वागत गरेका थिए । बेइजिङस्थित नेपाली दुतावास अधिकारी र अन्य नेपालीलाई समेत प्रधानमन्त्रीलाई स्वागत गरेका थिए ।
प्रधानमन्त्रीलाई बेइजिङको ‘दियायुताई स्टेट गेष्ट हाउस’ मा राखिएको छ । उहाँ त्यहाँ पुगेर नेपाली दूतावास बेइजिङले आयोजना गरेको रात्री भोजमा सहभागी हुनुभएको छ । प्रधानमन्त्री दाहालले त्यहाँ नेपालका लागि चीनका पूर्वराजदूत, नेपाल मामिला विज्ञहरु, नेपाली समुदाय र सञ्चारकर्मीहरुमाझ सम्बोधन गर्नुहुनेछ ।
भोली आइतबार उहाले चिनियाँ कम्युनिष्ट पार्टी विदेश विभागका नेताहरुसँग भेटवार्ता गर्ने कार्यक्रम र अवलोकन कार्यक्रम छ । प्रधानमन्त्रीले बेइजिङमा रहँदा एक टेलिभिजनलाई अन्तर्वार्ता पनि दिनुहुनेछ ।
सोमबार उहाँले चिनियाँ राष्ट्रपति सि जिनपिङसँग भेटघाट गरेर त्यहाँबाट चेन्दु उड्ने कार्यक्रम छ ।
