काठमाडौ ११ चैत्र ।
आगामी वैशाख ३१ लागि निर्धारित स्थानीय तह निर्वाचनका लागि मतदान केन्द्र निर्धारणको काम अन्तिम चरणमा पुगेको छ ।
अब ११ जिल्लाबाट मात्र केन्द्रको प्रस्ताव आउन बाँकी रहेको जानकारी गराउदै आयोगले आगामी चैत्र २० गतेसम्ममा सबै केन्द्रको टुंगो लाग्ने जनाएको छ ।
मधेशी मोर्चाको पकड मानिएको दुई नम्बर प्रदेशमा स्थानीय राजनीतिक दलको विरोधका कारण हालसम्म कुनै पनि जिल्लाबाट प्रस्ताव आउन नसकेको आयोगले जनाएको छ ।
मतदाता नामावली र मतदान केन्द्रको टुंगो एकैपटक लगाउने तयारी गरेको आयोगले प्रदेश नम्बर दुईको समस्या समाधानको प्रयास भइरहेको र चाडै नै टुंगो लाग्ने जनाएको छ ।
यस्तै मतपत्र छपाईको काम पनि धमाधम भइरहेको आयोगका प्रवक्ता सूर्यप्रसाद शर्माले जानकारी दिनुभयो । शुक्रबारसम्म १८ जिल्लाका लागि मतपत्र छपाईको काम सकिएको र थप चार जिल्लाका लागि आजदेखि काम सुरु हुने जनाएको छ ।
