काठमान्डौ चैत १०।
प्रधानमन्त्री पुष्पकमल दाहालले तोकिएको समयमा स्थानीय तहको निर्वाचन गर्नका लागि एक जुट भएर जुट्न आफ्ना पार्टीका सांसदहरुलाई निर्देशन दिनु भएको छ ।
आज बसेको माओवादी केन्द्र संसदीय दलको बैठकमा समसामयीक राजनीतिक घटनाक्रमका बारेमा जानकारी गराउँदै प्रधानमन्त्री दाहालले यस्तो निर्देशन दिनु भएको हो । दलको बैठकमा प्रधानमन्त्री दाहालले माओवादी केन्द्रको पक्षमा निर्वाचनको वातावरण बन्दै गएको समेत उल्लेख गर्नु भयो ।
साथै उहाँले मधेसी मोर्चासँग आफू चीन भ्रमणबाट फर्किए लगत्तै सहमति गर्ने दाबी गर्नु भयो । मोर्चाका नेताहरुसँगको छलफल सकारात्मक रहेको र सहमतिको विषय लगभग सार्बजनिक गर्ने चरणमा पुगिसकेको उहाँले जानकारी गराउनु भयो ।
प्रधानमन्त्री दाहालले सिमांकनलाई थाती राखेर अन्य विषयमा मोर्चासँग सहमतिको प्रयास भइरहेको बताएको नेता टोपबहादुर रायमाझीले जानकारी दिनु भयो ।
