कन्चनपूर ४ चैत्र ।
संविधान कार्यन्वयन र राष्ट्रिय एकता बलियो बनाउन भन्दै नेकपा एमालले सुरु गरेको मेची महाकाली राष्ट्रिय अभियान आज कन्चनपूरमा समापन भएको छ ।
पार्टी अध्यक्ष केपी शर्मा ओलीले कञ्चनपुरमा पत्रकार सम्मेलन गरि अभियानको औपचारिक समापन भएको जानकारी गराउनुभएको हो । अभियानको सन्देश सभा भने भोलि सुर्खेतमा हुने जनाइएको छ ।
५ जनाको ज्यान जाने गरी भएको सप्तरी घटनापछि कार्यक्रम स्थगित भएको प्रदेश नं २ मा भने नयाँ स्वरूपमा विशेष कार्यक्रम छिटै सञ्चालन हुने पार्टी अध्यक्ष ओलीले जानकारी गराउनु भएको छ ।
पत्रकार सम्मेलनमा बोल्दै ओलीले एमालेले आयोजना गरेको शान्तिपूर्ण सभामा अवरोध गर्ने आवतजावतमा समस्या उत्पन्न गराउने जस्ता काम लोकतन्त्र र बहुलवादी समाजका लागि चुनौतीको बिषय भएको बताउनु भयो ।
यस्ता गतिविधिले देशलाई मात्र नभएर स्वयं यसका प्रयोगकर्तालाई समेत ठूलो हानी र्पुयाउने भन्दै जिम्मेवारीवोधका साथ प्रस्तुत हुन पनि ओलीले आह्वान गर्नु भएको छ ।
गत फागुन २१ गते झापाको काँकडभिट्टाबाट शुरु भएको अभियान अन्तरगत एमालेले काँकरभिट्टा, बिर्तामोड, दमक, विराटचोक, इटहरी, इनरुवा, राजविराज, हेटौंडा, नारायणगढ, कावासोती, भूमही, भैरहवा, जीतपुर, लमही, नेपालगञ्ज, गुलरिया, राजापुर, टीकापुर, लम्की, धनगढी र महेन्द्रनगरमा सभा गरेका थिए ।
अभियानको प्रचारप्रसारका लागि झन्डै १० लाख घरधुरीमा पुगेर कार्यकर्ताले ५० लाखभन्दा बढी जनतालाई पार्टीको अपिल वितरण गरेका र २५ किलोमिटरभन्दा लामा ¥यालीहरू भएको अध्यक्ष ओलीले बताउनुभयो ।
“अभियान नेकपा (एमाले)ले सुरु गरे पनि यो पार्टीको मात्रै अभियान होइन, राष्ट्रकै अभियान हो, पत्रकार सम्मेलनमा अध्यक्ष ओलीद्वारा जारी प्रेस वक्तव्यमा भनिएको छ— अभियानमा प्राप्त सामाजिक र नैतिक पुँजीलाई हामी आगामी दिनमा राष्ट्र निर्माण र संविधान कार्यान्वयनमा अधिकतम सदुपयोग गर्ने सङ्कल्प गर्दछौँ ।”
“अभियानको तेस्रो दिन राजविराजमा मधेसी मोर्चाका कार्यकर्ता विखण्डनकारी र हिंसात्मक तत्वहरूको हतियार राख्ने आडका रूपमा प्रयोग हुनु दुखद र चिन्ताको विषय हो” —वक्तव्यमा भनिएको छ ।
तत्काल राजनीतिक दलसम्बन्धी विधेयकलगायत अन्य आवश्यक कानुनहरू अविलम्ब निर्माण गर्न, निर्वाचन क्षेत्र निर्धारण आयोग तत्काल गठन गर्न, प्रदेशसभा र प्रतिनिधिसभाको निर्वाचनको कार्ययोजना प्रस्तुत गर्न, संविधान संशोधन विधेयक फिर्ता लिन र निर्वाचनसम्बन्धी अन्योल हटाएर सिङ्गो राष्ट्रलाई निर्वाचनको दिशामा अग्रसर गराउन अध्यक्ष ओलीले आह्वान गर्नुभयो ।
