काठमाडौ २ चैत्र ।
इंग्लिस क्लब लेस्टर सिटी च्याम्पियन्स लिग फुटबलको क्वाटरफाइनलमा प्रवेश गरेको छ । गएराति सम्पन्न खेलमा सिटीले घरेलु मैदानमा स्पेनिस क्लब सेभिल्लालाई पराजित गर्दै अन्तिम आठमा स्थान बनाएको हो ।
घरेलु मैदानमा भएको अन्तिम १६ अन्तरगत दोस्रो लेगको खेलमा सिटीले सेभिल्लालाई २–० ले पराजित गर्दै समग्रमा ३–२ को जित निकालेको हो । सिटी पहिलो लेगमा सेभिल्लासँग २–१ ले पराजित भएको थियो ।
निरन्तरको खराव प्रर्दशनपछि मुख्य प्रशिक्षक क्याउडियो राईनेरीलाई बर्खास्त गरेको लेस्टरले च्याम्पियन्स पछिल्लो लिगमा ऐतिहासिक सफलता हात पारेको हो ।
सिटीका लागि कप्तान वेस मोर्गान र मार्क अलब्राइटनले एक एक गोल गरे । २७ औं मिनेटमा मोर्गानले गोल गर्दै पहिलो हाफमा लेस्टरलाई १–० को अग्रता दिलाए । ५४ औं मिनेटमा अलब्राइटनले अग्रता दोब्बर पारे ।
७४ औं मिनेटमा समिर नास्री दोहोरो पहेँलो कार्ड खाँदै मैदानबाट बाहिरिएपछि भने सेभिल्ला १० खेलाडीमा सीमित भएको थियो ।
च्याम्पियन्स लिगको क्वाटरफाइनल ड्र आगामी शुक्रबार सार्वजनिक गरिनेछ । अहिलेसम्म लेस्टर सिटीसहित युभेन्ट्स, बार्सिलोना, रियल मड्रिड, बार्यन म्युनिख र बोरुसिया डर्टमुण्डले अन्तिम ८ मा स्थान बनाइसकेका छन् ।
लिग अन्तरगत आज राति एथ्लेटिको मड्रिड र वार्यन लेभरकुशन तथा म्यानचेस्टर सिटी र मोनाकोबिचको खेल हुनेछ । यी दुई खेलपछि लिगको अन्तिम ८ मा पुग्ने थप दुई टिमको टुंगो लाग्नेछ ।
