काठमान्डौ फाल्गुन २९।
राष्ट्रिय प्रजातन्त्र पार्टीका नेता प्रकाशचन्द्र लोहनीले पार्टी परित्याग गर्नु भएको छ । पार्टीका पूर्व राष्ट्रिय अध्यक्ष समेत रहेका लोहनीले राजधानीमा आज पत्रकार सम्मेलन गरी पार्टी परित्याग गरेको घोषणा गर्नुभएको हो ।
लोहनीले पार्टी अध्यक्ष कमल थापालाई तीन पृष्ठ लामो पत्र लेख्दै पार्टी त्याग गरेको औपचारिक जानकारी गराउनु भएको हो । पार्टी एकीकरणपछि अध्यक्ष थापाले मनोमानी गरेको भन्दै लोहनी रुष्ट हुनुहुन्थ्यो ।
पार्टीको चुनाव चिन्ह हलो छाडेको, सरकारमा जानेबारे आफूखुसी निर्णय गरेको, राजदूत सिफारिसमा सल्लाह नगरेको लगायतमा लोहनीको असन्तुष्टी थियो ।
यस्तै उहाँले पार्टी परित्याग गरेपनि राजनीतिबाट भने निश्क्रिय नहुने बताउनु भएको छ । आफूले २५ बर्षदेखि काम गरेको पार्टी छाड्नुपर्दा दुःख लागेको लोहनीको भनाई छ ।
एकता महाधिवेशनपछि पार्टी विधानलाई उपेक्षा गरिएको र समझदारीलाई लत्याउने काम गरिएको आरोप लोहनीले लगाउनु भएको छ ।
