काठमाडौ २१ फागुन ।
सरकारले विभिन्न मुलुकका लागि सिरफारिस गरेका १२ राजदूतको सुनुवाई प्रक्रिया आजदेखि सुरु हुदैछ । सुनुवाई प्रक्रिया अघि बढाउन मन्त्रीपरिषदले पत्राचार गरेसँगै संसदीय सुनुवाई विशेष समितिले प्रक्रिया अघि बढाउन लागेको हो ।
समितिले आजदेखि प्रस्तावित राजदुतविरुद्ध सार्वजनिक उजुरी आह्वान गर्ने तयारी गरेको छ । सिफारिस १२ राजदुतविरुद्ध उजुरी दिन इच्छुकले १० दिन भित्र समितिको कार्यालयमा उजुरी दिन सकिने समिति सचिव धु्रवप्रसाद घिमिरेले जानकारी दिनुभयो ।
सूचना दिने व्यक्तिले आफ्नो परिचय स्पष्ट खुलाउनुपर्ने तर उसले नाम खुलाउन नचाहे गोप्य राखिने पनि समितिले जनाएको छ ।
गत फागुन ९ गते बसेको मन्त्रीपरिषद बैठकले विभिन्न १४ मुलुकमा राजदुत सिफारिस गरेको भएपनि विवादित छबीका भन्दै युएईका लागि सिफारिस आशा लामा र स्पेनका लागि प्रस्तावित भरत राइमाझीको नाम फिर्ता भएपछि बाँकी १२ जनाको प्रक्रिया अघि बढेको हो ।
