सप्तरी, फागुन १९ ।
नेकपा एमालेले मधेसी मोर्चालाई आफ्नो मेचि महाकाली अभियानका क्रममा कुनै अवरोध नर्पुयाउन आग्रह गरेको छ । मोर्चाले अवरोध गरे पनि अभियान नरोकिने उहाँले बताउनुभयो ।
दुई साता लामो मेची महाकाली अभियानको पूर्वसन्ध्यामा सप्तरी पुग्नुभएका एमाले सचिव योगेश भट्टराईले मोर्चाको बन्द र चक्काजाम खेदजनक रहेको बताउनुभयो । उहाँले कुनै पनि अवरोधले एमालेको मधेस अभियान नरोकिने प्रष्ट पार्नुभयो ।
मधेसी मोर्चाले एमालेलाई मधेस प्रवेशमा रोक लगाउने घोषणा गरे लगत्तै बिहीवार एमाले सचिव भीम आचार्य, योगेश भट्टराई र २ नम्बर प्रदेश संयोजक सप्तरी पुग्नुभयो । मोर्चाले एमालेको कार्यक्रमलाई लक्षित गरेर चक्काजाम घोषणा गरेको छ ।
एमाले सचिव भट्टराईले मोर्चाले बन्दका कार्यक्रम स्थगित नगरे पनि एमालेको अभियान अघि बढ्ने र कुनै पनि अवरोधको जनताले नै प्रतिवाद गर्ने बताउनुभयो । कार्यक्रममा मुस्लिम समुदायका अगुवासहित मधेसवादी दलका केही कार्यकर्ता एमालेमा प्रवेश गरेका छन् ।
