काठमाडौं, फागुन १९।
आजका लागि बोलाइएको व्यवस्थापिका संसद्को बैठक सूचना टाँसेर स्थगित गरिएको छ । विशेष कारणले आजको संसद बैठक स्थगित गर्नु परेको संसद् सचिवालयले जनाएको छ ।
संसदको अर्को बैठक आगामी फागुन २७ शुक्रबार दिउँसो १ बजेका लागि निर्धारण गरिएको छ । संसदमा छलफलका लागि बिजनेस नभएका कारण बैठक आठ दिनका लागि पर धकेलिएको हो ।
असन्तुष्ट पक्ष मधेसी मोर्चाको मागको संबोधनका लागि भन्दै सरकारले संसद सचिवालयमा दर्ता गरेको संविधान संशोधनको प्रस्तावका बारेमा प्रमुख दल र मधेसी मोर्चाबीच ठोस सहमति हुन नसकेका कारण संसद्का पछिल्ला अधिकांश बैठक सूचना टाँस गरेर स्थगित हुँदै आएका छन् ।
सभामुख ओनसरी घर्ती उहाँका पति पूर्वअर्थमन्त्री वर्षमान पुनको स्वास्थ्य उपचारका क्रममा थाइल्यान्डमा हुनुहुन्छ । दलहरुबीच संविधान सशोधनको विषयमा सहमति भई संसद्लाई बिजनेस प्राप्त भएको खण्डमा उहाँ तुरुन्त स्वदेश फर्कन सक्नुहुने उहाँका प्रेस सल्लाहकार बबिन शर्माले जानकारी दिनुभयो ।
