काठमाडौ १८ फागुन ।
मुलुकको पछिल्लो गतिरोध अन्त्यको पहल स्वरुप प्रधानमन्त्री पुष्पकमल दाहालले आज पनि प्रमुख सत्तासाझेदार दल नेपाली कांग्रेस सहित मधेशी मोर्चासँग छलफल गर्दै हुनुहुन्छ ।
यद्यपी बैठकको समय भने तोकिएको छैन । बैठकमा स्थानीय निकाय निर्वाचन तथा संसदमा प्रक्रिया अघि बढेको संविधान संशोधन प्रक्रियाका विषयमा आज पनि छलफल हुने प्रधानमन्त्रीको निजी सचिवालयले जनाएको छ ।
पहिलो चरणमा त्रिपक्षीय छलफल भए पछि त्यसैको आधारमा राप्रपा सहितको सत्ता साझेदार दलसँग दोस्रो चरणमा बैठक बस्न लागेको हो ।
सरकारले संविधान संशोधन विधेयक थाती राखेर स्थानीय तहको निर्वाचनमा जान गरेको आग्रह मधेसी मोर्चाले अस्वीकार गरेको छ । आजको बैठकमा पनि मधेसी मोर्चाले आफ्नो अडान कायमै राख्ने जनाएको छ ।
संविधान संशोधन नभए सम्म कुनै पनि निर्वाचन हुन नदिने र कुनै पनि निर्वाचनमा सहभागी नहुने मोर्चाले जनाएको छ । मोर्चाले स्थानीय तहको निर्वाचनको लागि दल दर्ता समेत नगर्ने जनाएको छ ।
