पाँचथर, फागुन १६ ।
सामान्य प्रशासनमन्त्री केशवकुमार बुढाथोकीले एमालेले बाहिरबाट निर्वाचनको रटान लगाएर भित्रबाट सरकारलाई असफल बनाउने पड्यन्त्रमा लागेको आरोप लगाउनु भएको छ ।
पाँचथरको फिदिममा आज पत्रकारहरुसँग कुरा गर्दै मन्त्री बुढाथोकीले यस्तो बताउनु भएको हो । उहाँले एमालेले स्थानीय तहको निर्वाचन हुन नदिने षड्यन्त्र गरिरहेको आरोप लगाउनु भएको छ ।
एमालेले स्थानीय तहको निर्वाचन विथोल्न संवैधानिक एजेन्डा नै नबोकेको राप्रपासँग साँठगाँठ गरिरहेको उहाँको भनाइ थियो । मन्त्री बुढाथोकीले संविधान संशोधन प्रस्तावमा मुलुकलाई अहित हुने कुनै विषय नभए पनि आफू पछि परिन्छ भन्ने डरले एमालेले अनावश्यक बखेडा झिकेको आरोप लगाउनु भयो ।
सार्थै उहाँले नेपाली कांग्रेसकै नेतृत्वमा संविधान जारी भएको र कार्यान्वयनको नेतृत्व पनि कांग्रेसले नै लिएर मुलुकलाई निकाश दिने दाबी गर्नु भयो ।
