काठमाडौ १६ फागुन ।
लमजुङको सुन्दरबजारस्थित कृषि तथा पशु विज्ञान अध्ययन संस्थान क्याम्पसमा आज बिहान दुई बिद्यार्थी समुहबीच झडप भएको छ । अनेरास्ववियु समर्थित विद्यार्थी र नेविसंघ समर्थित विद्यार्थीबीच झडप हुँदा एक प्रहरी जवान घाइते भएका छन् ।
झडपलाई छुट्याउने क्रममा विद्यार्थीको प्रहारबाट सुन्दरबजार इलाका प्रहरी कार्यालयका सई होमनाथ अधिकारी घाइते भएको डीएसपी समीरचन्द्र खरेलले बताउनु भयो । खरेलको स्थानीय कर्मदा अस्पतालमा उपचार भइरहेको छ ।
झडपका क्रममा केही विद्यार्थी घाइते भएको प्रहरीले जनाएको छ । नेविसंघ समर्थित कम्तीमा ४ जना विद्यार्थी घाइते भएको र उनीहरुको पनि स्थानीय कर्मदा अस्पतालमा उपचार भइरहेको नेविसंघ समर्थित विद्यार्थीहरुले बताएका छन् ।
अनेरास्ववियुका विद्यार्थीको आक्रमणबाट आफ्ना विद्यार्थी घाइते भएको नेविसंघले दावी गरेको छ । यसअघि गत माघ १७ गते राती नेबिसंघद्वारा गरिएको होस्टेल आक्रमणको विषयमा छानबिन समितिले १५ दिन भित्र बुझाउनु पर्ने प्रतिवेदनलाई क्याम्पसले सार्वजनिक नगरेको भन्दै अनेरास्ववियु समर्थित विद्यार्थीले हिजो क्याम्पसमा तालाबन्दी गरेका थिए ।
नेविसंघले त्यही ताला फोड्ने क्रममा दुई विद्यार्थीबीच आज बिहान झडप भएको हो । प्रहरीले अहिले स्थिति नियन्त्रणमा लिएको र थप घटना हुन नदिन प्रहरी परिचालन गरिएको प्रमुख जिल्ला अधिकारी जिसीले बताउनु भयो ।
