एजेन्सी फागुन १५।
इंग्लिस प्रिमियर लिगमा गएराति भएको खेलमा चेल्सीद्धारा स्वान्सी सिटी पराजित भएको छ । घरेलु मैदानमा भएको खेलमा चेल्सीले स्वान्सी सिटीलाई ३–१ ले पराजित गरेको हो ।
चेल्सीको जितमा सेस फाब्रिगास, पेड्रो र डिएगो कोस्टाले गोल गरे । यस्तै स्वान्सी सिटीका लागि फर्नान्डो लोरेन्टेले एक गोल फर्काए । खेलको १९ औं मिनेटमा फाब्रिगासले गोल गर्दै चेल्सीलाई सुरुवाति अग्रता दिलाए ।
जितपछि शीर्ष स्थानको चेल्सीको २६ खेलबाट ६३ अंक भएको छ । एक खेल कम खेलेको दोस्रो स्थानको म्यानचेस्टर सिटीको ५२ तथा तेस्रो स्थानको टोटनह्याम र चौथो स्थानको आर्सनलको समान ५० अंक छ ।
राति नै भएका अरु खेलमा एभर्टनले सन्डरल्याण्डलाई २–०, क्रिष्टल प्यालेसले मिडल्सबर्गलाई १–० तथा वेष्ट ब्रोमले बोर्नमाउथलाई २–१ ले हरायो । यस्तै वाट्फोर्ड र वेष्ट ह्याम तथा हल सिटी र बर्नलीले समान १–१ को बराबरी खेल्दै अंक बाँडेका छन् ।
