एजेन्सी फागुन १२।
स्पेनिस ला लिगाको गएराति भएको खेलमा रियल म्याड्रिड भ्यालेन्सिया सँग पराजित भएको छ । ला लिगााको शीर्षस्थानमा रहेको रियलले भ्यालेन्सियासँग २–१ ले पराजित भए सँगै अंक दूरी बढाउने सम्भावना गुमाएको छ ।
अंक तालिकाको चौधौं स्थानमा रहेको भ्यालेन्सियाले खेलको ९ मिनेटभित्रै दुई गोल गर्दै रियललाई स्तब्ध पारेको थियो । खेलको चौथो मिनेटमै वेष्टह्यामका पूर्व स्ट्राइकर सिमोन जाजाले गोल गर्दै भ्यालेन्सियालाई अग्रता दिलाएका थिए ।
त्यस्तै ९ औं मिनेटमा फाबियान ओरेलानाले दोस्रो गोल गर्दै भेलेन्सियाको अग्रता दोब्बर बनाए । खेलमा ७२ प्रतिशत बल आफ्नो पकडमा राखेपनि रियल म्याड्रिडले गोल गर्न भने ४४ औ मिनेट कुर्नु परेको थियो ।
क्रिस्टियानो रोनाल्डोले खेलको ४४ औ मिनेटमा गोल गर्दै खेलमा फर्किने प्रयास गरे पनि जित निकाल्न भने सकेन । भ्यालेन्सियासँग रियल म्याड्रिड पराजित भएपछि बार्सिलोनालाई केही राहत मिलेको छ ।
रियल म्याड्रिड भन्दा एक खेल बढी खेलको बार्सिलोना म्याड्रिडभन्दा १ अंकले मात्र पछाडि परेको छ । २२ खेल खेलेको रियल म्याड्रिडको ५२ अंक छ भने २३ खेल खेलेको बार्सिलोनाको ५१ अंक छ ।
