काठमाडौ ११ फागुन ।
संविधान संशोधन प्रस्ताव अघि बढाउने विषयमा दलहरुबीच सहमति जुट्न नसकेपछि व्यवस्थापिका संसदको आजको बैठक पनि सुचना टाँस गरी स्थगित भएको छ ।
लामो समयपछि बोलाइएको संसद्को हिजोको बैठक पनि सूचना टाँसेरै स्थगित गरिएको थियो । सरकारले आजको संसद बैठकबाट संशोधन प्रक्रिया अघि बढाउने बताएपछि एमाले लगायतका विपक्षी दलले निर्णय लिन नसक्दा आज पनि संसद बैठक बस्न नसकेको हो ।
सरकारले मोर्चाको माग सम्बोधनका लागि भन्दै आजको संसद बैठकमा संशोधन विधेयक अघि बढाउने तयारी गरेको थियो । यसअघि एमालेले सरकारले निर्वाचनको मिति घोषणा गरे संसदमा संहोधन विधेयक अघि बढाउन दिने बताउदै आएको थियो ।
सरकारले आगामी वैशाख ३० गते स्थानीय तहको निर्वाचन घोषणा गरेको भएपनि संविधान संशोधन प्रस्ताव निर्णायार्थ प्रस्तुत हुँदा आउने परिणामलाई मोर्चाले स्वीकार गर्ने प्रतिबद्धता नआएसम्म प्रस्ताव अघि बढाउन नहुने प्रतिपक्षीको अडानका कारण आजको बैठक प्रभावित भएको हो ।
विशेष कारण जनाउँदै संसद्को अर्को बैठक भोलि अपरान्न ३ बजे बस्ने गरी स्थगित भएको संसद सचिवालय जनाएको छ ।
