काठमाडौ फागुन ९।
मधेसी मोर्चाको विरोधका बाबजुद पनि सरकारले आज स्थानीय तहको निर्वाचन मिति घोषणा गर्ने तयारी गरेको छ । आगामी वैशाख अन्त्यमा देशभर एकै चरणमा मतदान हुनेछ ।
निर्वाचन आयोगले जेठ १ र २१ गते दुई चरणको चुनाव गर्नेगरी मिति घोषणा गर्न प्रस्ताव गरे पनि सरकारले वैशाख अन्तिममा देशभर एकै चरणमा चुनाव गर्नेगरी मिति घोषणा गर्ने तयारी गरेको स्रोतले जनाएको छ ।
जेठ १५ गते बजेट ल्याउनुपर्ने संवैधानिक व्यवस्था भएकाले आगामी वैशाख अन्तिममा नै चुनाव गर्ने सरकारले तयारी गरेको हो । यस विषयमा प्रधानमन्त्रीले हिजो साँझ निर्वाचन आयोगका पदाधिकारी र असन्तुष्ट मधेसी मोर्चासँग छुट्टाछुट्टै छलफल गर्नुभएको थियो ।
सरकारले आज निर्वाचनको मिति घोषणा गर्नुअघि मोर्चाको माग पूरा गर्ने औपचारिक निर्णय गर्ने प्रधानमन्त्रीको निजी सचिवालयले जनाएको छ ।
यस्तै आज नै मन्त्रिपरिषदको बैठक बसेर स्थानीय तह पुनर्संरचना आयोगको प्रतिवेदन स्वीकार गर्दै परिमार्जनको लागि टोली बनाउने तयारी छ । त्यसपछि साँझ निर्वाचनको मिति घोषणा हुने बताएको छ ।
