काठमाडौ ९ फागुन ।
लेगानेसलाई पराजित गर्दै बार्सिलोना स्पेनिस ला लिगाको दोस्रो स्थानमा उक्लिएको छ । गएराति घरेलु मैदान नाउ क्याम्पमा समपन्न खेलमा बार्साले लेगानेसमाथि २–१ को संघर्षपूर्ण जीत निकालेको हो ।
बार्सिलोनाका लागि दुवै गोल लियोनल मेस्सीले गरे । खेलको चौथो मिनेटमा नै गोल गर्दै मेस्सीले बार्सिलोनालाई सुरुवाति अग्रता दिलाएपनि पहिलो हाफसम्म लेगानेस १–० ले पछि पर्यो ।
त्यसपछि ७१ औं मिनेटमा युनाइ लोपेजले लेगानेसका लागि बराबरी गोल फर्काए । त्यसपछि अन्तिम समयसम्म बराबरी भएको खेलमा ९० मिनेटमा पाएको पेनाल्टीको अवसरलाई सदुपयोग गर्दै मेस्सीले बार्सिलोनाका लागि जीत दिलाएका हुन् ।
खेलमा लेगानेस बार्सिलोनामाथि निकै आक्रमक रुपमा प्रस्तुत भएको थियो । जितपछि २२ खेलबाट ५१ अंक जोडेको बार्सिलोना दोस्रो स्थानमा उक्लिएको छ । बार्सिलोना दुई खेल कम खेलेको शीर्ष स्थानको रियल मड्रिड भन्दा एक अंकले मात्रै पछि छ ।
तेस्रो स्थानमा झरेको सेभिल्लाको २३ खेलबाट ४९ अंक छ । ला लिगा अन्तरगत राति नै भएका अन्य खेलहरुमा भिल्लारियलले रियल सोसिडाडलाई १–०, भ्यालेन्सियाले एथ्लेटिको बिल्बाओलाई २–० तथा सेल्टा डि भिगोले ओसासुनालाई ३–० ले हराएको छ ।
