काठमाडौ ८ फागुन ।
उपराष्ट्रपति नन्दबहादुर पुनले संविधानले तोकिएको समयभित्र तीनवटै तहको निर्वाचन गरेर संविधान कार्यान्वयनमा लाग्न दलहरुलाई आग्रह गर्नुभएको छ ।
नवाकोटको कुमरी गाविस–५ नेपानेडाडामा आज सुकमान मेमोरियल पोलिक्लिनिकको उद्घाटन गर्दै उहाँले जनताको लामो संघर्ष र बलिदानीबाट प्राप्त संविधानलाई कार्यान्वयन गराउन निर्वाचन आवश्यक रहेकोमा जोड दिनुभयो ।
नयाँ संविधान कार्यान्वयन गराउनका लागि निर्वाचन आवश्यक रहेको भन्दै उहाँले जनताको लामो त्याग पछि आएको संविधान कार्यान्वयनका लागि दलहरु सबै मिलेर निर्वाचन गराउन तर्फ सबै लाग्नुपर्ने धारणा राख्नुभयो ।
राज्यले दुर्गम भेगमा स्वास्थ्य सेवा विस्तार गर्न ध्यान दिनुपर्नेमा उहाँले जोड दिनुभयो । सुकमान मेमोरियल पोलिक्लिनिक स्थापना भएपछि कुमरी गाविस तथा धादिङको केवलपुर र जीवनपुर गाविसका बासिन्दाले स्वास्थ्य सेवा पाइरहेका छन् ।
विसं २०७२ वैशाख १२ गतको भूकम्पले भत्काएको पोलिक्लिनिक भवन रु एक करोड ५० लाखको लागतमा पुनःनिर्माण गरिएका हो ।
