काठमाडौ ७ फागुन ।
नेपाली काँग्रेस नेता कृष्णप्रसाद सिटौलाले संक्रमणकालिन अवस्था अन्त्य गर्नका लागि निर्वाचनको विकल्प नरहेको बताउनु भएको छ ।
नेपाल निजामती कर्मचारी युनियन संघ झापाको सातौँ जिल्ला अधिवेशनको आज चन्दुगढीमा उद्घाटन गर्दै उहाँले अब संक्रमणकाल अन्त्यका लागि कर्मचारी तयार रहनुपर्ने बताउनु भयो ।
स्थायी सरकारका रुपमा रहेको कर्मचारी संयन्त्रले सुशासनका लागि निष्पक्ष भएर काम गर्नुपर्ने उल्लेख गर्दै उहाँले आफ्नो अधिकारको खोजी गर्दा राष्ट्रसेवक कर्मचारीले देश र जनतालाई भूल्न नहुने धारणा राख्नुभयो ।
संविधान कार्यान्वयनका लागि तीन तहको निर्वाचन अत्यावश्यक रहेको भन्दै सिटौलाले मुलुक विवाद र द्वन्द्वको अलमलमा पर्दा लोकतन्त्र खतरामा पर्न सक्नेतर्फ सबैलाई सचेत रहन आग्रह गर्नुभयो ।
अधिवेशनले आगामी तीनवर्षे कार्यकालका लागि निजामती कर्मचारी युनियन संघ झापाको अध्यक्षमा कवीन्द्र विक्रम नेम्वाङलाई निर्विरोध चयन गरेको छ ।
त्यस्तै सचिवमा ज्ञानु सिवाकोटी, सहसचिवमा भानुभक्त भट्टराई र कोषाध्यक्षमा तेजबहादुर पौडेललाई निर्विरोध चयन गरेको छ ।
