काठमाडौ २ फागुन ।
नेपाली काँग्रेसका सभापति शेरबहादुर देउवाले संविधानको प्रभावकारी कार्यान्वयनका लागि निर्धारित समयभित्र तीन तहको निर्वाचन सम्पन्न गर्नुपर्ने बताउनु भएको छ ।
प्रजातान्त्रिक प्राध्यापक सङ्घले आज राजधानीमा आयोजना गरेको कार्यक्रमलाई सम्बोधन गर्दै उहाँले तोकिएको समयभित्र निर्वाचन हुन नसके मुलुकमा संवैधानिक सङ्कट आउने खतरा रहेकाले तत्काल निर्वाचनतिर लाग्नुपर्नेमा जोड दिनुभयो ।
पूर्वप्रधानमन्त्री समेत रहनु भएका देउवाले स्ववियुको निर्वाचनमा नेवि सङ्घले विजय हासिल गरेमा राष्ट्रिय राजनीतिमा नेपाली काँग्रेस सफल हुन सक्ने विचार व्यक्त गर्नुभयो ।
कार्यक्रममा बोल्दै कांग्रेस महामन्त्री शशांक कोइरालाले प्राध्यापकले विभिन्न क्षेत्रमा अनुसन्धान गरी प्रकाशित ‘प्रज्ञा दर्शन’ उपयोगी रहेको विचार व्यक्त गर्दै त्रिविका प्राध्यापक तथा विद्यार्थीले अनुसन्धानमूलक कार्य गर्नुपर्नेमा जोड दिनुभयो ।
