काठमाडौ २ फागुन ।
राष्ट्रिय प्रजातन्त्र पार्टी राप्रपाको कार्यसम्पादन समिति बैठक आजपनि बस्दैछ । धुम्बाराहीस्थित पार्टी केन्द्रिय कार्यलयमा मध्यान्न १२ बजेपछि बस्ने बैठकमा अध्यक्ष कमल थापाको राजनितिक प्रतिवेदनमाथि छलफल हुने जनाइएको छ ।
हिजोबाट सुरु भएको बैठकमा पहिलो दिन पार्टी अध्यक्ष थापाले राजा सहितको प्रजातन्त्र तथा हिन्दुराष्ट्र हुनुपर्ने प्रस्ताव सहितको राजनीतिक प्रतिवेदन प्रस्तुत गर्नुभएको थियो । यद्यपी थापाको हिन्दु राष्ट्र बनाउनु पर्ने एजेण्डा माथि भने बैठकमा छलफल नहुने बताइएको छ ।
सो बिषय महाधिवेशनले टुंगो लगाउने सहमति एकीकरणकै समय भएकाले कार्यसम्पादन समितिको बैठकमा अन्य राजनितिक विषयमाथि मात्र छलफल हुने पार्टी सहप्रवक्ता मोहन श्रेष्ठले जानकारी दिनुभयो ।
पार्टीको आगामी महाधिवेशनका लागि साझा एजेण्डा तय गर्न जारी बैठकमा अध्यक्ष थापाले राजनीतिक अवस्था गम्भीर मोडमा पुगेको चर्चा गर्दै मुलुकलाई संक्रमणकालिन अवस्थाबाट बचाउन राजा सहितको प्रजातन्त्रको परिकल्पना गर्नुभएको हो ।
यस्तै बैठकमा राष्ट्रिय अध्यक्ष प्रकाशचन्द्र लोहनीले प्रस्तुत गर्नुभएको आर्थिक प्रतिवेदनमाथि समेत छलफल हुनेछ । आगामी महाधिवेशनमा साझा एजेण्डा तय गर्ने उद्धेश्य सहित जारी बैठकले दुवै अध्यक्षको प्रतिवेदनलाई सहमतिका आधारमा आजै अन्तिम रुप दिने तयारी भएको सो पार्टीले जनाएको छ ।
गत मंसिरको पहिलो साता राप्रपा नेपाल र राप्रपाबीच एकीकरण भएपछि बनेको राप्रपाको पहिलो एकता महाधिवेशन आगामी शुक्रवारदेखि ४ दिन राजधानीमा हुँदैछ ।
