काठमडौ २८ माघ ।
नेकपा एमालेका उपाध्यक्ष भीम रावलले केही दिन भित्रमा स्थानीय निर्वाचनको मिति घोषणा नगरे सरकारको औचित्य समाप्त हुने बताउनु भएको छ । चुनाव घोषणा गरेमा भने संविधान संशोधन विधेयकमा छलफल गर्न दिने उहोले बताउनु भयो ।
रिपोर्टर्स क्लब नेपालले आज आयोजना गरेको साक्षात्कारमा बोल्दै उहाँले वर्तमान सरकारको विकल्प खोज्ने बेला भएको भएको बताउनु भयो ।
तत्काल निर्वाचनको वातावरण बनाउनु पर्नेमा जोड दिँदै उहाँले चुनाव गराउनका लागि अर्को सरकार गठनको आवश्यकता रहेको धारणा राख्नुभयो ।
पूर्वमन्त्री समेत रहनु भएका रावलले मुलुकको संकट समाधान हुन्छ भने सदनमा दर्ता भएको संविधान संशोधन प्रस्तावमाथि छलफल गर्न दिन एमाले तयार रहेको जिकिर गर्नुभयो ।
मधेसी मोर्चा लगायत अन्य दलहरुसँग छलफल गरेर मुलुकको समस्याको समाधान निकाल्नका लागि आफ्नो पार्टीले सकारात्मक प्रयत्न गर्ने रावलले बताउनु भयो ।
