काठमाडौँ, २८ माघ । परराष्ट्रमन्त्री डा प्रकाशशरण महतले छिमेकीसँगको सम्बन्ध सत्ता र दलगत राजनीति परिपूरण गर्ने हतियारको रुपमा प्रयोग गर्ने सोचले राष्ट्रियता कमजोर बन्ने बताउनु भएको छ ।
राजधानीमा आज आयोजित रक्षा र कूटनीतिबाट राष्ट्रिय सुरक्षाको सुदृढीकरण विषयक गोष्ठीको उद्घाटन गर्दै उहाँले लामो समयदेखि नेपालमा छिमेकीसँगको सम्बन्धलाई हतियारका रुपमा प्रयोग गरेकाले राष्ट्रियता कमजोर बन्दै गएको बताउनु भयो ।
मन्त्री महतले कूटनीतिलाई अत्यन्त बुद्धिमतापूर्वक प्रयोग गर्न सके मात्रै सुरक्षाको सुदृढीकरण र कूटनीतिलाई परिपक्व बनाउन सक्ने धारणा राख्नुभयो ।
कूटनीतिक माध्यमबाट आफ्नो स्वार्थ, हित र अधिकारलाई जोडदार ढङ्गबाट राखेर राष्ट्रिय सुरक्षा सुदृढ र सुनिश्चित भई लक्ष्य पूरा गर्न सकिने उहाँको धारणा छ ।
मन्त्री महतले नेपालले भारत र चीनको सम्बन्धलाई प्राथमिकतामा राखेर काम गर्ने प्रयास गरिरहेको बताउँदै दुवैसँगको सम्बन्ध विश्वासमा आधारित रहेका तुलना गर्न नमिल्ने बताउनु भयो ।
प्रधानसेनापति राजेन्द्र क्षत्रीले मुलुकको सार्वभौमसत्ता, अखण्डता र स्वाधीनताका लागि कूटनीति र सुरक्षा नै मुख्य खम्बा भएको बताउनु भयो ।
