२६ माघ, चितवन।
प्रधानमन्त्री पुष्पकमल दाहालले मधेसी मोर्चासँग सहमति बनेपछि स्थानीय तहको निर्वाचनको मिति घोषणा गरिने बताउनु भएको छ ।
प्रेस सेन्टर चितवनले आज भरतपुर विमानस्थलमा आयोजना गरेको पत्रकार सम्मेलनमा प्रधानमन्त्री दाहालले यस्तो बताउनु भएको हो ।
मन्त्रिपरिषदबाट निर्णय गरेर निर्वाचन आयोगलाई पत्र लेख्नु भनेकै निर्वाचनको मिति तोक्नु सरह भएको बताउदै प्रधानमन्त्री दाहालल मधेसी मोर्चा र अरुलाई पनि सामेल गरेर चुनाव गराउनु पर्ने भएकाले प्राविधिक रुपमा गते नभनिएको बताउनु भयो ।
सबै नेपाली जनताले बैशाख वा जेठमा निर्वाचन गर्ने सरकारको तयारीबारे जानकारी पाइसकेको दावी गर्दै उहाँले निर्वाचन हुनेमा शंका नगर्न आग्रह गर्नु भयो । साथै उहाँले निर्वाचनको तयारीमा लाग्न सबैलाई आग्रह समेत गर्नु भयो ।
निर्वाचनको निम्ति आवश्यक पर्ने सबै ऐनहरु बनिसकेकाले अव निर्वाचन अघि बढाउन ऐनको समस्या नभएको उल्लेख गर्नु भयो । प्रधानमन्त्री दाहालले स्थानीय तहको कार्यदलको रिपोर्टलाई १५ दिन समय दिइएकाले दुई हप्ता सदन स्थगित गरिएको समेत जानकारी गराउनु भयो ।
