धाइजन माघ २४ । ए.एस. फाउण्डेशन रिक्रिएशन ट्रेनिङ सेन्टर झापाद्धारा आयोजित रक क्लाम्बिङ आज(सोमबार)देखि धाइजनमा सुरु भएको छ ।
विद्यार्थीलाई लक्षीत गरी उनीहरुको शारीरिक, मानसिक, सम्वेगात्मक विकास संगै नेतृत्व विकास गर्ने मूल उद्धेश्यले सो कार्यक्रम सञ्चालनमा ल्याइएको हो ।
दुई दिवशीय रक क्लाइम्बिङको पहिलो दिन धाइजनस्थित बाँसबारी सामुदायिक वन उपभोक्ता समूहको सिमसार तथा पर्यटकीय क्षेत्रमा एक जना शिक्षकसहित १९ जनाले भाग लिएका सेन्टरका सल्लाहकार मदनकुमार भण्डारीले जानकारी दिए ।
बिहान ८ देखि दिउँसो २ बजेसम्म सञ्चालित रक क्लाइम्बिङमा देउनियाँस्थित सेन्ट जेभियर्स स्कूलका स्काउट शिक्षक एलेक्स घिमिरेसहित ९ जना छात्रा र ९ जना छात्रले भाग लिएका आयोजक सेन्टरका प्रमुख एवँ सगरमाथा आरोही झापाका युवा अनिष लुईंटेलले बताए ।
सो विद्यालयका ९ देखि १६ वर्ष उमेर समूहका कक्षा ६ देखि ९ सम्मका विद्यार्थीहरुलाई रक क्लाइम्बिङ समापनपछि इन्टरनेशनल आउट डर स्ट्रक्टर लण्डन तथा द ड्युक अफ इडन वर्गस् इन्टरनेशनल अवार्डबाट गोल्ड अवार्ड होल्डर लुईंटेलले अन्र्तराष्ट्रिय मान्यता प्राप्त प्रमाण पत्र प्रदान गरेका थिए ।
सहभागीहरुलाई सम्भावित दुर्घटनाबाट मुक्त राख्न क्लाइम्बिङ हेल्मेट, रोप, हार्नेस, जुमर, एटिसी गाइड, क्योरबिनर लगायत अत्याधुनिक प्रविधिद्धारा निर्मित विदेशबाट आयात गरिएका जोखिममुक्त सामग्रीको प्रयोग गरी रक क्लाइम्बिङ गराइएको थियो ।
रक क्लाइम्बिङमा भाग लिएकाहरुलाई क्लाम्बिङ स्थलमा प्रत्यक्ष रुपमा उपस्थित क्लाइम्बिङ स्ट्रक्टरहरु सोना ठकुरी, बिमला थापा, कल्पना पोखरेल, दीपा लोहार, अजय पासवान र जुगल भूजेलले सहजिकरण गरेका थिए ।
