काठमाडौ २४ माघ ।
परराष्ट्रमन्त्री डा प्रकाशशरण महतले नुवाकोटलाई त्रिदेशीय मार्ग बनाउनुपर्नेमा जोड दिनुभएको छ । जिल्लाको बट्टारमा आज आयोजित ‘चौथो नुवाकोट महोत्सव’को समापन कार्यक्रममा बोल्दै मन्त्री महतले यस्तो बताउनु भएको हो ।
उहाँले नुवाकोटबाटै भारत–नेपाल–चीन जोडिने छोटो दूरीको रक्सौल – वीरगन्ज – गल्छी – विदुर – धुन्चे – रसुवागढी – केरुङ नाका पुगिने भएका कारण आर्थिक रुपले समृद्ध जिल्ला बनाउन आफूले पहल गर्ने प्रतिवद्धता समेत जनाउनु भयो ।
एक फरक प्रसङ्गमा उहाँले तीनै तहको निर्वाचन निर्धारित समयमै हुनुपर्नेमा जोड दिनुभयो । संविधान संशोधन मधेस केन्द्रित दलले भने जस्तो नहुने भन्दै मन्त्री महतले सबैको आवश्यकता र मागलाई सम्बोधन हुने गरी सहमतिका आधारमा अघि बढ्नुपर्ने धारणा राख्नुभयो ।
कार्यक्रममा कृषि विकास राज्यमन्त्री राधिका तामाङले महोत्सवले नुवाकोट हुंँदै नेपाल–चीन जोड्ने रसुवागढी नाकाबाट विकास, उत्पादन, कृषि, उद्योग लगायत सम्भावना उजागर गर्न मद्दत पुगेको बताउनुभयो ।
एघार दिनसम्म सञ्चालित महोत्सवमा रु चार करोडभन्दा बढीको कारोबार भएको र दुई लाखभन्दा बढी दर्शकको सहभागिता रहेको आयोजक नुवाकोट उद्योग वाणिज्य सङ्घका अध्यक्ष ताराबहादुर कार्कीले बताउनुभयो ।
