काठमाडौ २४ माघ ।
उपप्रधान तथा गृहमन्त्री विमलेन्द्र निधिले संविधान संशोधन वर्तमान सरकारको प्राथमिकता रहेको बताउनु भएको छ । संविधान संशोधनपछि मात्रै निर्वाचन सम्भव रहेकाले संशोधन प्रस्ताव पारित गराउनु नै सरकारको पहिलो प्राथमिकता भएको प्राष्ट पार्नुभयो ।
महोत्तरी सदरमुकाम जलेश्वरमा आज सन्चारकमीसँगको कुराकानीमा गृहमन्त्री निधिले संविधान संशोधनपछि एकसाथ देशका सबै जनता र पार्टीलाई चुनावमा सहभागी हुने बाटो खुला हुनुका साथै आन्दोलनरत मधेसी मोर्चालगायतको मागसमेत सम्बोधन हुने भएकाले संविधान संशोधनपछि मात्रै चुनाव हुने ठोकुवा गर्नुभयो ।
गृहमन्त्री निधिले सरकार निर्वाचनको तयारीलाई पनि तीव्रता दिएको र आन्दोलनरत पक्षसहित विपक्षसँग पनि सहमतिको कुराकानी एकसाथ अघि बढाएकाले सहमति हुनेबित्तिकै चुनावको मिति पनि तोकिएर देश चुनावमा जाने निश्चित रहेको प्रष्टाउनुभयो ।
