काठमाडौ २३ माघ ।
मधेसी मोर्चा आवद्ध दल तमलोपाका अध्यक्ष महन्थ ठाकुरले चुनाव विरोधी नभएको तर व्यवस्थापिका संसदमा दर्ता भएको संविधान संशोधन प्रस्ताव पारित नभएसम्म कुनैपनि चुनाव नहुने दाबी गर्नुभएको छ ।
रिपोर्टर्स क्लब नेपालले आज आयोजना गरेको साक्षात्कारमा बोल्दै उहाँले कांग्रेस माओवादी गठबन्धनको सरकारले संशोधन प्रस्ताव पारित गराउनै पर्ने धारणा राख्नुभयो । सरकारले संशोधन प्रस्ताव पारित नगरी चुनाव गराउन खोजे त्यो दिवा सपनामात्र हुने ठाकुरको भनाई छ ।
संविधान संशोधन प्रस्ताव पारित नभएसम्म स्थानीय निकायको चुनाव नहुने भन्दै उहाँले पहिले संशोधन प्रस्तावलाई सदनबाट पारित गराउने प्रक्रिया तर्फ सरकार लाग्न सुझाव समेत दिनुभयो ।
मुलुकमा प्रजातन्त्र, लोकतन्त्र र गणतन्त्र प्राप्तिका लागि अरुलेजस्तै आफूहरु पनि सँगै लड्दै आएको उल्लेख गर्दै ठाकुरले भने समस्याको समाधान नगरी गरिने कुनैपनि चुनावले देशलाई निकास नसक्ने भएकाले पहिला समस्याको समाधान गर्नुपर्नेमा जोड दिनुभयो ।
अध्यक्ष ठाकुरले संविधान संशोधन नगरी गरिने कुनैपनि चुनावमा मधेशी मोर्चाले भाग नलिने बताउँदै सरकारले बलपुर्वक, लाठी र बन्दुक चलाएर चुनाव गर्न खोजे जटिल परिस्थिति उत्पन्न हुने बताउनु भयो ।
यस्तै हालै सरकारले सिके राउतलाई गरेको गिरफ्तारीको बारेमा प्रतिक्रिया दिदै ठाकुरले राउतलाई गिरफ्तारी वा हत्या गरेर समस्या समाधान नहुने धारणा राख्नुभयो ।
