काठमाडौ २३ माघ ।
नेपाली कांग्रेसका सभापति शेरबहादुर देउवाले आज मधेशी मोर्चाका नेताहरुसँग छलफल गर्दै हुनुहुन्छ । पहिले संविधान संशोधन कि निर्वाचन भन्ने विषयमा दलहरुबीच विवाद बढिरहेका बेला देउवाले मोर्चाका नेताहरुलाई छलफलका लागि बोलाउनु भएको हो ।
बूढानीलकण्ठस्थित देउवा निवासमा अपरान्न ३ बजेपछि हुने छलफलमा देउवाले जारी राजनितिक गतिरोध अन्त्य गर्ने विषयमा कुराकानी हुने जनाइएको छ । संविधान संशोधनपछि मात्र निर्वाचनको मिति घोषणा गर्नुपर्ने मोर्चाको अडान छ ।
मोर्चाले संविधान संशोधन प्रस्ताव परिमार्जनसहित पारित नभई जबरजस्ती निर्वाचनमा गए सरकारलाई दिएको समर्थन फिर्ता गर्ने चेतावनी समेत दिएको छ ।
उता प्रमुख प्रतिपक्षी नेकपा एमाले भने संविधान संशोधन प्रक्रियालाई थाती राखेर निर्वाचनमा जानु पर्ने बताउदै आएको छ । मोर्चाका नेताहरुसँग यसअघि प्रधानमन्त्री पुष्पकमल दाहालले छलफल गर्नुभएको थियो ।
निर्वाचन सम्बन्धी विधेयकहरु संसदबाट पारित भइसकेको तथा निर्वाचन आयोगलाई निर्वाचनको तयारी थाल्न सरकारले निर्देशन दिएपनि मोर्चाको असहमतिका कारण निर्वाचनको मिति घोषणा हुन सकेको छैन ।
