पाँचथर, २२ माघ । ऊर्जामन्त्री जनार्दन शर्माले उज्यालो नेपाल अभियानमा सहयोग गर्न सर्वसाधारणमा अपील गर्नु भएको छ ।
सदरमुकाम फिदिममा आज बिहान प्रेस सेन्टर पाँचथरले गरेको पत्रकार सम्मेलनमा उहाँले अहिले मन्त्रालयले सञ्चालन गरेको उज्यालो नेपाल अभियानलाई सबै क्षेत्रबाट सहयोग गर्न आह्वान गर्नु भएको हो ।
मन्त्री शर्माले अब काम गर्ने कर्मचारीलाई प्रशंसा र गल्ती गर्नेलाई दण्ड गर्दै जाने पनि स्पष्ट गर्नुभयो ।
अर्काे प्रसङ्गमा उहाँले सरकार निर्वाचनमा लागिपरेकाले जसरी पनि चाँडै स्थानीय तहको निर्वाचन हुने बताउँदै निर्वाचन आयोग समेत तयारीका लागि जुटिसकेकाले चाँडै मिति घोषणा गरिने बताउनु भयो ।
काबेली कोरिडोर क्षेत्रको निरीक्षणमा जानु भएका मन्त्री शर्माका साथमा ऊर्जा मन्त्रालयका सचिव अनुप उपाध्याय र नेपाल विद्युत् प्राधिकरणका प्रबन्ध निर्देशक कुलमान घिसिङसमेत सहभागी हुनुहुन्छ ।
