काठमाडौ २१ माघ ।
सरकारले अनावश्यक रुपमा माओवादी पार्टीमाथि निगरानी बढाउने तयारी थालेको भन्दै नेत्रविक्रमचन्द विप्लव नेतृत्वको नेकपा माओवादीले आज राजधानीमा विरोध प्रर्शन गर्ने भएको छ ।
शान्तिपूर्ण कार्यक्रममा समेत प्रतिबन्ध लगाउने गरी सरकारले अनावश्यक हस्ताक्षेप गर्न खोजेको भन्दै त्यसको विरोधमा आज अपरान्न ३ बजेपछि राजधानीको शान्तिबाटिकामा विरोध प्रदर्शन गर्ने तयारी भएको माओवादी जनवर्गीय संगठन ब्युरो इनचार्ज मोहन कार्की जिवन्तले जानकारी दिनुभयो ।
नेपाल प्रहरीले माओवादी कार्यकर्ताको गतिविधिमाथि निगरानी राख्न यसअघि नै देशभर सर्कुलर जारी गरिसकेको अवस्थामा हिजो सिंहदरबारमा बसेको मन्त्रीपरिषद बैठकमा समेत माओवादी गतिविधिमाथि निगरानी बढाउने बारेमा छलफल भएको जनाइएको छ ।
राजधानीको शान्तिबाटिकाबाट सुरु हुने विरोध प्रदर्शन पुरानो बसपार्क, भद्रकाली, शहिदगेट, सुन्धारा, न्युरोड हुदै पुनः शान्तिबाटिकामा नै पुगेर सभामा परिणत हुनेछ । सभालाई नेकपा माओवादीका शिर्षस्थ नेताहरुले सम्बोधन गर्ने कार्यक्रम रहेको छ ।
