काठमाडौं, माघ २१।
स्थानीय तह निर्वाचनको तयारी गर्न सरकारले आज निर्वाचन आयोगलाई औपचारिक पत्र पठाउँदैछ । हिजोको मन्त्रिपरिषद बैठकको निर्णय अनुसार सरकारले आज आयोगलाई औपचारिक पत्राचार गर्ने तयारी गरेको हो ।
मन्त्रिपरिषद बैठकले आगामी वैशाख अन्तिम हप्तादेखि जेठ १० गतेभित्र स्थानीय चुनाव सक्ने गरी तयारी थान निर्वाचन आयोगलाई पत्र लेख्ने निर्णय गरेको थियो ।
निर्वाचनका लागि आवश्यक विधेयक संसदबाट पारित भएपछि निर्वाचनको मिति तय गर्ने बाटो खुला भए पनि वर्षाअघि चुनावको सम्भावना भने कम देखिएको छ ।
स्थानीय तह पुनर्संरचना आयोगको प्रतिवेदन कार्यान्वयनमा ढिलाई भए सँगै निर्वाचन समय मै हुनेमा आशंका बढेको हो ।
नयाँ संविधानानुसार स्थानीय तह वा पुरानो संरचनाको स्थानीय निकायको चुनाव भन्नेबारे भने स्पष्ट भइसकेको छैन । यस्तै स्थानीय तह पुनर्संरचना आयोगको प्रतिवेदनमा सुझाव लिन गठित कार्यदलले आज देखि काम थाल्दैछ ।
आयोगलाई सरकारले दिएको मापदण्ड र उसको प्रतिवेदनमाथि प्राप्त गुनासाका सम्बन्धमा अध्ययन गरी दुई हप्ताभित्र सुझाव दिन हिजोमन्त्रिपरिषद वैठकले कार्यदल गठन गरेको हो ।
