काठमाडौँ, माघ २१ गते ।
नेपाल सांस्कृतिक सङ्घको दोस्रो केन्द्रीय महाधिवेशन आज देखि राजधानीमा सुरु हुदै छ । महाधिवेशनको उद्घाटन नेपाली काँग्रेसका सभापति शेरबहादुर देउवाले गर्ने कार्यक्रम रहेको बताइएको छ ।
‘समृद्धिका लागि हाम्रो अभियान, सम्मान, सुरक्षा र पहिचान’ भन्ने नाराका साथ सुरु हुन लागेको महाधिवेशनमा ७५ वटै जिल्लाबाट पहिलोपटक प्रतिनिधि सहभागी हुन बताइएको छ ।
महाधिवेशनको उद्घाटन कार्यक्रमलाई कंग्रेस वरिष्ठ नेता रामचन्द्र पौडेल, महामन्त्री डा. शशाङ्क कोइराला लगायतका नेताले सम्बोधन गर्ने कार्यक्रम रहेको छ ।
नेपाली काँग्रेसको शुभेच्छुक संस्थाका रूपमा रहेको सङ्घको महाधिवेशनमा करिब एक हजार जना प्रतिनिधिको सहभागिता हुने सङ्घका केन्द्रीय अध्यक्ष तीर्थबहादुर थापाले जानकारी दिनु भयो ।
महाधिवेशनले ४ वर्षका लागि सभापति, दुई महामन्त्री, एक कोषाध्यक्ष सहित ५० जनाको केन्द्रीय कार्यसमिति निर्वा्चित गर्ने छ ।
संविधानको कार्यान्वयन, आगामी निर्वाचन, लोकतन्त्र र गणतन्त्रको संस्थागत विकास, राष्ट्र निर्माणमा सदैव महत्वपूर्ण भूमिका निर्वाह गर्ने सांस्कृतिकर्मीको हक, हित र संरक्षणका लागि महाधिवेशनले ठोस निर्णय गर्ने सङ्घका अध्यक्ष थापाल बताउनु भयो ।
